| تبليغات | X |
آذربايجان ادبياتينين، بوتؤولوکده آذربايجان ادبي فيکرينين گؤرکملي
نومايندهسي اولان خالق شاعيري بختيار وهابزاده دونیاسین دهییشدیر.
وطن
چاغيرير ايندي بوتون ميلتي ايمدادا وطن،
دييشيلمز اي اوغول، جنّته دونيادا وطن.
بيزه مئيدان اوخويان بيلمهليدير بيردفعهليک،
نه ساتيلماز، نه وئريلمز بينهدن يادا، وطن.
سينه آلتيندا گرک قلب کيمي هر آن دؤيونه،
يانا اولدوز کيمي هر سؤزده، هر ايمضادا وطن.
وطن عشقيندن اوجالسين بوتون ايستکلريميز،
ياشاسين آرزودا، مقصدده، تمننادا وطن.
اولولار اويمادي وارـ دؤولته، يالنيز دئديلر:
-ان بؤيوک بخشيشيميز بيزدن هر اؤولادا: وطن!
وطن عشقيندن آلار بختييار اؤز قودرتيني
دؤيونر قلبي کيمي هر يئني ميصراعدا وطن.
۱۹۹۴
ورزغان قارقالارینا
*جعفر پور رضوی
گئدین دئیین قارقالارا، ورزغانا گاز یئتیشیب
یووالاریزدا یاتمایین، قیش گلمهمیش یاز یئتیشیب
آخ نییه قارقار ائدیسیز، شهردارا گیر وئریسیز
مرثیهنین واختی کئچیب، زامان چال ـ جاز یئتیشیب
وار نه ایشیز سیزین، شهردار هر یئری سؤکور
دستور فقط شهردارا، هر یئری سؤک قاز یئتیشیب
آز دانیشین، چیغیرمایین، واردی نه ربطی سیزلره
فرمانداری جنابلاری ورزغانا آز یئتیشیب
شوکر ائلییین قویون دئییل میدانداکی مجسّمه
رأی آلینیب نمادلاردان، ورزغانا غاز یئتیشیب
گئدین اؤزوزه آغلایین، اکینچییه آز دئیینین
ورزغانین اؤز بوغداسی ورزغانا آز یئتیشیب
جادهلرین تصادفی نه ربطی وار قارقالارا
ورزغانین افسری یوخ، سیزلره سرباز یئتیشیب
ائیلهمهیین مسخره دای میدانداکی نمادیزی
ابهتی یوخدو آمما بوینونا چوخ ناز یئتیشیب
قویون اینکلریز گئدیب فضای سبزی اوتلاسین
حاققا دوراق شهرداریز، اینکلره ساز یئتیشیب
شاعیری دیمدیکلهمهیین یوخدو گوناهی، واز کئچین
بیلمم نه اولدو زلفعلی ورزغانا داز یئتیشیب
"حبیبی"دن بیر غزل
گر سنون چون قیلمییام چاک ای بت نازک بدن
گؤروم اولسون اول قبا اهیینیمده پیراهن کفن
چیخمایا سئودای زولفون، باشدان ای مه گر یوز ایل
استخوان کللهم ایچره دوتسا عقربلر وطن
دوشدو شبنم باغه گل تا گول نیثار ائتسون سنه
سبزهنین هر برگینه بیر دور تاپشورموش چمن
ای کؤنول عشق اهلینه هر شب گولردون شمع تک
من دئمزمیدوم کی بیر گون آغلایاسیدیر گولن
نئچون دینلنسین حبیبی سنسیز ای اندامی گول
چون باتا جیسمینه تنده هر توک اولموش بیر تیکن
حبیبی
اوچوموز... (من - سن – او)
۱)
شنبه، یای آخشامی، تبریز، اوچوموز،
رباعی، مثنوی، غزل، چارپارا
عزرائیل ساقی دی، اؤلوم مزه میز.
ووردوق اوچ استکان شعر ساغلیغینا.
۲)
بیز اوچ قیز، اوچ اوغلان، اوچ فاجعه یدیک،
قینیندان سییریلن اوچ قانلی خنجر.
پولیسلر بیلمه ین جنایت ایدیک،
آدیمیز دیللره دوشه جک سحر.
۳)
ناغیلین سونوندا دوشن اوچ آلما،
آغزیندا جهنم اولدوق یئیه نین.
بیریمیز یئییلدیک، بیریمیز یئدیک،
بیریمیزسه اولدوق ناغیل دئیه نین.
۴)
داغیتدیق حیاتین شاه مات لیغینی،
یورولدوق دوز گئدیب، اًیری وورماقدان.
چوخدان بؤلوشموشدو شاه لار دونیانی،
بیز قیرغین وئریلدیک، قارادان – آغدان!
۵)
«هذیانا دؤنموشدو تبیندن تبریز»
استامینوفن تک اوچوموز بیردن،
قاوراندیق شهرین قارا قانینا –
بورا سه راه امین – اوره کدیر هًمن.
۶)
داها دئیه نمیرم نه اولدو؟ نه لر....
بیر شاعر اًزیلدی شعرین اووجوندا.
سپیلدی گؤیلره قان قافیه لر
شاه اثر یاراندی،.. : غزل – چارپارا
۷)
بیز اوچ فاجعه یدیک، بیر فاحشه نین،
باغیشلانماز سوچو یاراتدی بیزی.
الله لا، شیطانلا، آلما وئره نین،
ائتلاف هیئتی آلداتدی بیزی.
۸)
بیز اوچ حادثه یدیک، اوچ سس، اوچ آیه، -
سوزولدوک گئجه نین یالقیزلیغیندان.
تلاوت اولوندوق شعر دیلی له ،
نم هانسی تانری نین گؤز یاشلاریندان
.بلکه بو یئرلره بیرده گلمهدیم
دومان سالامات قال، داغ سالامات قال
دالیمجا سو سپیر یوخسا بولاغلار
لئیسان سالامات قال، یاغ سالامات قال
...
قییووران قارتاللار یوخ اولدو چنده
نرگیزلر سولوخدو شئهلی چمنده
ای قارا گؤز پری، دالیمجا سن ده
بویلان سالامات قال، باخ سالامات قال
...
گلدیم قارشیلادی گول لر، چیچکلر
گئدیرهم ال ائدیر بوز بیچنکلر
نیدامی چایلارا دئدی کو لکلر
بولاغ سالامات قال، آخ سالامات قال
...
داغلارین پلنگی شیری ده سن سن
شاعری ده سن سن، شعری ده سن سن
بینی، برکتی، خئیری ده سن سن
چوبان سالامات قال، ساغ سالامات قال
ممد آراز